Formas breves de pensamento

Luísa Villalta (A Coruña, 1957-2004), alén de extraordinaria poeta, foi unha destacada narradora, dramaturga, ensaísta, tradutora, filóloga e violinista. Viron a luz os seus poemarios Música reservada (1991), Ruído (1995), Rota ao interior do ollo (1995) e En concreto (2004), que se recollen en Pensar é escuro. Poesía reunida (1991-2004) (Galaxia, 2023), que a converteron nunha das voces máis importantes da literatura galega dos nosos tempos. No campo dramático, salientan: Concerto para un home só (1989), O representante (1990), O paseo das esfinxes (1991), As certezas de Ofelia (1999), Os doces anos da guerra (2011) e Teatro completo (Galaxia, 2024), onde se recompilan todos os seus textos. Como narradora publicou Silencio, ensaiamos (1991), Teoría de xogos (1997) e As chaves do tempo (2001). En canto ao ensaio, deu ao prelo O “Don Hamlet” de Cunqueiro: Unha ecuación teatral (1992), Libro das colunas (2005) e O outro lado da música, a poesía (1999), reeditado por Editorial Galaxia en 2020.