Sindak

Hindi siya naniniwala sa mga kuwentong tungkol sa sumpa, multo, at lahat ng mga bagay na may kinalaman sa supernatural. Para sa kanya, gawa-gawa lang ang mga bagay na may temang ganito upang takutin ang mga tao sa mga bagay na wala namang pruwebang magpapatotoo. Hanggang sa magpasya ang pamunuan ng kumpanya na maglabas ng mga materyales na hango sa mga tunay na salaysay ng katatakutan. Ayaw man ni Jeffrey, wala siyang pagpipilian dahil nakataya roon ang kaniyang posisyon sa kumpanya.

Sa paghahanap niya ng mga kuwentong maaari nilang ilathala, nakilala niya ang isang babaeng nagpakilalang Janelle, na isa namang magandang estranghera na nag-udyok sa kanyang tanggapin ang isang lumang tomo na may tatlong matang naka-emboss sa pamagat. Lingid sa kanyang kaalaman ang sumpang kalakip nito, na siya namang nagbabadyang makapagpabago ng kanyang mga pananaw at paniniwala ukol sa mga bagay na nakakakubli sa ordinaryong mga mata.

Ang Sindak ay isang nobela ng katatakutan tungkol sa misteryo ng pag-ibig at pagkabigo at sa kalituhang naidudulot ng mga ito sa mga taong unti-unting nilalamon ng pagdadalamhati at kadiliman.